Ní luaithe paimfléad amháin chugat go dtagann an dara ceann agus an tríú ceann. An Dochtúir Peadar Kirby, léachtóir sinsearach sa Scoil Dlí agus Rialtais in Ollscoil Chathair Bhaile Átha Cliath; Breandán Ó Doibhlin, aistritheoir agus údar agus an Dochtúir Alan Titley, ceann roinne na Gaeilge i gColáiste Phádraig, Droim Conrach, an triúr a scríobh.
Agus a leithéid d'fhealsúnacht atá acu. Seo Kirby mar thús: "Dúinne in Éirinn, caithfimid gan bacaint a thuilleadh le Fianna Fáil; ar bhealach, is iad na naimhde is mó atá ann do chúis na Gaeilge iad mar go ligeann siad orthu go bhfuil bá acu leis an nGaeilge ach ní mar sin a ghníomhaíonn siad (in ainneoin correisceachta sa pháirtí ar nós an Aire Éamon Ó Cuív.)
"Más cuid lárnach í an Ghaeilge de thodhchaí iomlán nua a chothú don tír seo, is é an Comhaontas Glas agus daoine forásacha eile comhghuaillithe dáiríre na cúise sin. Tá sé thar am é seo a aithint agus gan ligean d'Fhianna Fáil a thuilleadh úsáide a bhaint as an nGaeilge dá leas féin."
Scríobhann Kirby go bhfuil ré nua ar tairseach agus go mbeidh ar phobal na hÉireann cur chuige úr éifeachtach a lorg le sochaí níos cothroime a bhaint amach: "Is comhthéacs é sin ina bhféadfadh an Ghaeilge bláthú arís."
Creideann Kirby nach é meath na Gaeilge "an chúis imní is mó dúinn in Éirinn na linne seo, ach meath an phobail féin". De réir mar a scaoiltear agus mar a ghearrtar na snaidhmeanna idir daoine, is amhlaidh go séantar comhluachanna cultúir - ar nós teanga - agus comhdhualgais, mar shampla, gur cheart do gach duine a chuid cánach a íoc.
"Easpa freagrachta lucht maoine agus cumhachta is cúis leis sin" a scríobhann Kirby, "oidhreacht de chuid gné den choilíneachas é seo, go bhfuil uasaicme dhúchasach a rinne aithris ar na coilínithe."
Is cás le Ó Doibhlin ídiú comhluachanna traidisiúnta agus is léargas Críostúil a thugann sé ar an ábhar; ní cumas don duine maireachtáil gan sochaí nó comhluadar; beidh a áit féin ag an traidisiún inár saol i gcónaí. Sonraíonn sé atmaisféar cúng intleachtúil in Éirinn.
Tháinig deireadh le stair na nGael leis an Ghorta Mór agus ní raibh lucht an Bhéarla ábalta fíorstair na hÉireann a mhíníu dóibh féin nó do na glúnta a tháinig ina ndiaidh.
"Bearna dhothrasnaithe" atá ann agus tá a chruthú sin le feiceáil i gcruth fisiciúil ár gcuid bailte: "... cuir ceist ort féin: an bhféadfá dealbh de Bhrian Bóramha a shamhlú i lár Bhaile Átha Cliath, mar atá Siobhán d'Arc i gceartlár Pháras, nó Richard Coeur-de-Lion i Londain, agus ní áirím dealbh d'Aodh Mór Ó Néill i nDún Geanainn?
"Nó ainm Cholm Cille ar mhórshráid i gcathair Dhoire? Cá bhfaighidh tú Sráid Eoghain Rua Uí Néill i mbaile Ultach, nó Sráid Shéathrúin Céitinn i gCluain Meala?"
Tugann Titley achoimre chruinn ar thábhacht teanga: "Is í an Ghaeilge an rud is Éireannaí dínn dá bhfuil ann." Agus, dálta na beirte eile, molann gníomhartha mar chonchlúid lena aiste féin.
Ó thaobh an oideachais de, molann sé "ábhar amháin a theagasc i rang amháin bunscoile do gach páiste! Faoi láthair, ar éigean aidhm ar bith go minic le teagasc na Gaeilge seachas na deasghnátha a chomhlíonadh; tabharfaidh sé seo sprioc agus fócas don teagasc sin."
Ba mhaith leis go mbeadh ar an Stát "cuntas bliantúil a thabhairt ar cad é an dul chun cinn atá déanta acu maidir le leathnú na Gaeilge", is é sin, na tionscadail nua atá curtha chun cinn acu, agus go mbeadh "polasaí éigin earcaíochta acu maidir leis an nGaeilge de. Nuair a cuireadh polasaí na Gaeilge "éigeantaí" i leataobh, an sop féin níor cuireadh ina áit. Is é a thoradh go bhfuil daoine i Roinn an Oideachais féin atá ag plé le cúrsaí Gaeilge nach bhfuil déanamh a ngnó den teanga acu."
Tá an oiread smaointe agus moltaí sna leabhráin agus a choinneodh Coiste Comhairleach na Gaeilge gnóthach go ceann blianta.
Faoi Pheadar Kirby a fhágfar an focal scoir: "Ar ndóigh, ní leor fealsúnacht. Tá gá le beart dá réir. Ach cuidíonn fealsúnacht le gníomh a spreagadh, le daoine nua a mhealladh isteach san fhiontar, le fuinneamh a chothú."
• An Cultúr Gaelach: Cosaint na Daonnachta le Breandán Ó Doibhlin; Pobal, Féinmheas, Teanga le Peadar Kirby; "Beir leat do shár-Ghaeilge!" Súil siar agus ar aghaidh le hAlan Titley.
An Aimsir Óg a d'fhoilsigh. €5 ar gach ceann.